Yaxın illərdə Google üçün çox gərgin illərin olacağı gözlənilir. Şirkətin keçmiş əməkdaşları Google-ın iş sistemindən daha effektli və tez çalışan internet axtarış motoru üzərində çalışırlar.
Axtarış motorunun adı "Cuil" olaraq müəyyən olunub. Cuil keçmiş İrland dilində bilik mənasını verir.
Cuil hal-hazırda 120 milyard internet səhifəsini indeksləşdirib və bunun təxminən 5 milyon ABŞ dollarına yaxın sərmayə xərcləyib. "Mak.az"ın əldə etdiyi məlumatlara əsasən yeni yaradılacaq sistemin qurucuları keçmiş Google işçiləri Tom Kostello və onun həyat yoldaşı Anna Petersondur. Anna Peterson TeraGoogle indeksinin yaradıcılarındandır.
Layihənin digər iştirakçıları isə yenə keçmiş Google işçiləri Rassel Pauer və Lui Monyedir. Lui Monye əvvəllər eBay sonralar isə AltaVista kimi məhşur layihələrin rəhbəri vəzifələrində çalışıb.
Layihənin yaradıcıları qeyd edirlər ki, Cuil cari Google və Microsoft sistemlərindən müvafiq olaraq 3 və 10 dəfə daha güclüdür.
Xatırladaq ki, Nielsen NetRatings rəqəmlərinə əsasən hal-hazırda dünya internet axtarış bazarında Google 46,2% payla birinci yerdədir.
